५१ दिनमा सकियो ‘कोशेढुंगा’ को छायांकन

सरोज पौडेलको निर्देशनमा तयार भएको चलचित्र ‘कोशेढुंगा’ को छायांकन सकिएको छ। चलचित्रको सम्पूर्ण छायांकन ५१ दिनमा सकिएको निर्माण टिमले जानकारी दिएको छ। ‘पूर्ण बहादुरको सारङ्गी’ निर्देशन गरेका पौडेलको चलचित्र भएको कारण यसलाई चासोका साथमा हेरिएको छ ।

ललितपुरको च्यासलस्थित सेट लगाए छायांकन सुरु गरिएको चलचित्रको स्याङ्जाको आधिखोला, त्रिवेणी र सिरुवारी क्षेत्रमा खिचिएको चलचित्रको गीत मकवानपुरको चितलाङ्ग, मार्खुलगायत क्षेत्रमा खिचिएको छ। भदौ १२ गतेबाट चलचित्र नेपालसहित ४० भन्दा धेरै देशमा एकसाथ रिलिज हुने भएको छ ।

‘कोशेढुंगा’लाई प्याट्रिक सुवेदी र रमेश ढकालको सेभेन सिज इन्टरनेसनलले अन्तर्राष्ट्रिय बजारमा वितरण गर्दैछ । दर्शकमा रहेको अपेक्षा ‘कोशेढुंगा’ले पूरा गर्ने कार्यकारी निर्माता दिनेश खड्काले बताए ।

नरदेवी फिल्मसको प्रस्तुति रहेको चलचित्रमा सुरक्षा पन्त, आर्यन सिक्देल, ऋचा शर्मा, मन्जिल कुमार, नीति शाह, प्रवीण खतिवडा, हिउवाला गौतम, सरोज खनाल, विशाल पहाडी, दिनेश काफ्ले, लोकमणि सापकोटा लगायतको अभिनय रहेको छ । चलचित्रको निर्मातामा प्रेविल कँडेल र किशोर अनुराग छन् । कार्यकारी निर्माता दिनेश खड्का हुन् । बाबु श्रेष्ठले छायांकन गरिरहेको यो चलचित्रमा नहकुल खड्काको सम्पादन, आशिष अविरल र रिदम कँडेलको संगीत छ ।