सौगात र बेनिशाको ‘सिटामोल’ टिजरले दर्शकमा बढाउदैछ कौतुहलता

सौगात मल्ल र बेनिशा हमाल प्रमुख भूमिकामा रहेको चलचित्र ‘सिटामोल’ साउन २३ गतेबाट रिलिज हुँदैछ। रिलिज मिति नजिकिदै गर्दा चलचित्रको युनिट प्रचारप्रसारमा जुटेको छ। विभिन्न टेलिभिजन शो देखि मिडियासंगको भेटघाटमा टिम व्यस्त बनेको छ । बिशेष गरि चलचित्रको सार्वजनिक टिजरलाई लिएर दर्शकको सकारात्मक प्रतिक्रिया रहेको छ। सौगात मल्लले निर्वाह गरेको भूमिकाले दर्शकको मन जितिरहेको छ। निर्माण टिमले सार्वजनिक गरेको एक गीतले पनि दर्शकको साथ पाएको छ। दर्शकबाट मिलेको सकारात्मक प्रतिक्रियाले निर्माण टिम झन् उत्साहित बनेको छ ।

चलचित्रमा समावेश ‘झुम्का कानैमा’ गीत र गत हप्ता सार्वजनिक टिजर दुवैले दश लाख बढि दर्शकको साथ पाएका छन् । गीत र टिजर हेरेका दर्शकले चलचित्र हेर्न व्यग्र रहेको प्रतिक्रिया समेत दिएका छन् । ‘झ्यानाकुटी’ पछि पुनः यो सौगात र बेनिशाको जोडीलाई पर्दामा हेर्न उत्साहित रहेको प्रतिक्रिया दर्शकको छ ।

चलचित्रका निर्देशक राज बहादुर साने गीत र टिजरले दर्शकमाझ पाएको प्रतिक्रियाले आगामी प्रचार सामाग्री गीत र ट्रेलर उत्कृष्ट दिनु पर्ने चुनौती थपिएको बताउँछन् । चलचित्रका दुवै प्रचार सामाग्रीले दर्शकको अपेक्षा उच्च बनाएकाले अब आउने गीत र ट्रेलर अझै परिस्कृत भएर आउने विश्वास निर्माताद्धय भुगोल कार्की र विकासराज जोशीको छ ।

‘सिटामोल’ मार्फत् निर्माता तथा निर्देशकले बिम्बात्मक नेपाल र आम नेपालीको जनजीवन र परापुर्वकालदेखि नेपाली समाजमा जरा गाड्दै आएको कुसंस्कारलाई चिरफार गर्न खोजेको छन् । चलचित्रमा सौगात र बेनिशासहित श्री कृष्ण निरौला, जानुका विश्वकर्मा, लोकेन्द्र लेखक, भुगोल कार्की, हिउँवाला गौतम, सुशील पोखरेल, दिनेश रेग्मी, आरआर खड्का, ज्ञानु मल्ल, पवन भट्टराई, काजल भुजेल र बालकलाकार करण नेपाली, आराध्या राज्यलक्ष्मी डिसीको अभिनय छ ।

तुल्सी देवी फिल्म प्रालीले जुनतारा फिल्मस्को सहकार्यमा निर्माण भएको चलचित्रको कथा प्रदीप भारद्धाज र निर्देशक सानेले लेखेका हुन् । सिमोस सुनुवारको प्रस्तुती रहेको चलचित्रमा भुगोल कुमार कार्की र विकाश राज जोशी निर्माता तथा अप्सरा नेपाली, अजय मल्ल र कुमार केसी कार्यकारी निर्माता अनि गंगाराम श्रेष्ठ सह-निर्मातामा छन् ।