चलचित्र ‘मुनामदनको ब्रेकअप’ निर्माण घोषणा

दिपेन्द्र लामाको निर्देशनमा तयार हुने नयाँ नेपाली चलचित्र ‘मुनामदनको ब्रेकअप’ निर्माण घोषणा भएको छ। चलचित्रमा सामीप्यराज तिमल्सेनाको पटकथा र श्रीधर पौडेल कार्यकारी निर्माता रहनेछन् । निर्देशक लामा, लेखक सामीप्यराज र कार्यकारी निर्माता पौडेलबीच २०७५ सालमा ‘गोपी’ चलचित्रमा सहकार्य भएको थियो। तीनै पत्रकारिता पृष्ठभूमिका हुन्। यो चलचित्रका लागी कलाकार राज कटुवाल फाइनल भएका छन् ।

निर्देशक लामाका अनुसार बाँकी कलाकारका विषयमा टिमसँग छलफल भइरहेको र केही दिनभित्र टुंगो लाग्नेछ । ‘चलचित्रको पटकथामा सुहाउँदो भएकाले कटवाललाई अनुबन्धित गरेका हौं, बाँकी कलाकार पनि कथा र चरित्र अनुकूल हुनेगरी छान्ने हाम्रो योजना छ,’ लामाले भने ।

लेखक तिमल्सेनाले चलचित्रमा ग्रामीण परिवेशको फरक स्वादको प्रेमकथा हेर्न पाइने गराए । ‘पछिल्लो समय नेपाली चलचित्रमा हेरिँदै आएकाभन्दा भिन्न स्वभावका प्रेमकथा यसमा प्रस्तुत गरिनेछ,’ तिमल्सेनाले भने, ‘अहिले दर्शकलाई हलसम्म तान्न धेरै नै मुश्किल छ, त्यसकारण पटकथामा सक्दो मिहेनत गर्नेछौं ।’

कार्यकारी निर्माता पौडेलले कास्कीको ग्रामीण भेगमा चलचित्रको छायांकन गरिने बताए । ‘पटकथा र प्रिप्रोडक्सनको काम पर्फेक्ट भएपछि मात्र छायांकनमा निस्किनेछौं । हामी राम्रो प्रोडक्ट निकाल्न धैर्यका साथ काम गर्नेछौं,’ उनले भने ।