‘हाम्रो प्राण हाम्रो मधेस’ नारा सहित एलिजा फाउन्डेसनद्वारा शैक्षिक सामग्री वितरण

सामाजिक अभियन्ता तथा चर्चित अभिनेत्री एलिजा गौतमले ‘हाम्रो प्राण हाम्रो मधेस’ अभियानका साथ बारा निर्वाचन क्षेत्र नम्बर ४ मा आफ्नो सक्रियता बढाएसँगै उनको राजनीतिक यात्राको सम्भावना चुलिएको छ।

जनप्रतिनिधिहरूको उदासीनता र क्षेत्रको उपेक्षाप्रति स्थानीयवासीको गुनासो चुलिँदै जाँदा सामाजिक अभियन्ता तथा अभिनेत्री एलिजा गौतम जनचासोका मुद्दामा सक्रिय रूपमा देखा परेकी छन् ।

गौतमको अगुवाइमा सञ्चालित एलिजा फाउन्डेसनले आफ्नो वार्षिकोत्सवको अवसरमा कलैया उपमहानगरपालिका–१७ स्थित सुराही गाउँको श्री लोकतान्त्रिक प्राथमिक विद्यालयमा अध्ययनरत एक सय पच्चीस जना विद्यार्थीलाई स्कुल झोला तथा शैक्षिक सामग्रीहरू वितरण गरेको छ। यस कार्यक्रममा स्वयं फाउन्डेसनकी अध्यक्ष गौतमले विद्यार्थीहरूलाई सामग्री हस्तान्तरण गरेकी थिइन्। 

कार्यक्रममा  गौतमले बारा क्षेत्र नं. ४ मा वर्षौँदेखि दोहोरिरहने जनप्रतिनिधिहरूले निर्वाचनमा मात्र देखिने र त्यसपछि जनताको समस्या प्रतिको संवेदनशीलता हराउने प्रवृत्तिको आलोचना गरिन्। उनले भनिन्, “यस क्षेत्रका जनताले धेरै दुःख भोगिसकेका छन्, अब जनताको आवाज सुन्ने, बुझ्ने र समाधान गर्ने बेला आएको छ। यदि जनताले कुनै समस्या भएमा म र मेरो टिम सधैँसँग सम्पर्क गर्न आग्रह गरेकी छिन । शिक्षाको अभाव र विद्यालयको दयनीय अवस्थाबारे बोल्दै उनले विद्यालयमा कक्षा कोठाको अभाव, शौचालय र सुरक्षित खानेपानीको सुविधा नहुनुले बालबालिकाको शिक्षा प्रभावित भइरहेको बताइन्। विद्यालय आउने बालबालिकाहरू कठिन परिस्थिति भोग्दै अध्ययन गर्न बाध्य छन्, तर जनप्रतिनिधिहरू भने मौन बसेको उनले बताएकी छिन ।

शैक्षिक सामग्री वितरणपछि विद्यालयका विद्यार्थी र अभिभावकहरू खुसी भएका थिए । अभिभावकहरूका अनुसार यस्तो सहयोगले बालबालिकालाई पढ्न प्रोत्साहन मिल्नेछ र समाजमा सकारात्मक सन्देश प्रवाह हुनेछ।”स्थानीयवासीले पनि गौतमको यो पहलको स्वागत गर्दै अन्य सरोकारवाला व्यक्तिहरूले समेत यस्ता कार्यक्रममार्फत जनताको समस्या सम्बोधनमा सक्रिय भूमिका खेल्नुपर्ने धारणा पृयान्का यादवले बताइन् ।

यस क्षेत्रमा विकास र जनसरोकारका विषयहरूमा राजनीतिक नेतृत्वको कमजोर उपस्थिति देखिएसँगै सामाजिक अभियन्ताहरूको सक्रियता बढ्न थालेको जनाइएको छ। एलिजा गौतमको यो प्रयासलाई बारा क्षेत्र नं. ४ का जनताले वैकल्पिक नेतृत्वको सुरुआतको रूपमा समेत हेर्न थालेका छन्।