निताको ‘पार्वती’ को पोष्टर रिलिज, चलचित्र माघमा रिलिज हुने

निता फिल्म्सको प्रस्तुतीमा तयार हुने चलचित्र ‘पार्वती’ का दूई पोष्टर सार्वजनिक भएका छन् । रक्षा बन्धनको अवसर पारेर सार्वजनिक दुई पोष्टरमा अभिनेत्री निता ढुंगानालाई प्रस्तुत गरिएको छ। सार्वजनिक पहिलो पोस्टरमा ‘पार्वती’ पहेँलो छातामुनि,सिठी र पानीको बोतल बोकेर गम्भीर मुद्रामा देखिन्छिन्। यसले उनको जीवनमा हुने चुनौती, सोचमग्न स्वभाव र भित्रै लुकेको संवेदनशीलता झल्काउँछ। दोस्रो पोस्टरमा भने उनी गाउँले पोशाकमै हल्का मुस्कान र लजालु अदा सहित प्रस्तुत भएकी छन्, जसले उनको निराशता, बालपनको रमाइलो र जीवनप्रतिको सहज दृष्टिकोणको संकेत गर्छ।

निता ढुंगानाको निर्देशनमा तयार हुने चलचित्रले माघ १ गतेलाई प्रदर्शन मिति तय गरेको छ। निता ढुंगानाको कथा रहेको चलचित्रमा पटकथा तथा संवाद शिवम् अधिकारीको हो। चलचित्रको छायांकन कविर लाल र शाहिद लालले गर्नेछन्। निर्माण पक्षका अनुसार,‘पार्वती’ हास्य,भावना र सामाजिक सन्देश मिसिएको कथा हो,जसमा एक साधारण पात्रको नजरबाट जीवनका रंग, सम्बन्धका मिठास र संघर्षका भाव दर्शाइनेछ।

असोजबाट छायांकनमा जाने तयारीमा चलचित्र रहेको छ। निर्माण टिमले चलचित्रका कलाकारको औपचारिक जानकारी सार्वजनिक गरेको छैन। तर यो चलचित्रमा निर्देशक तथा कलाकार दिपाश्री निरौला प्रमुख भूमिकामा रहने खबर केहि समय अगाडी बाहिरिएको थियो।