रिषभ काफ्लेले ‘झानेको पिज्जा’ लाईभ स्ट्याण्ड अप कमेडी नेपाल टूर गर्ने

आरबिके प्रोडक्शनले नेपालका विभिन्न सहरमा गाईजात्रा विशेष कार्यक्रमका साथ हास्य यात्रा गर्ने भएको छ । अभिनेत्री तथा कार्यक्रम प्रस्तोता रिमा विश्वकर्माको यो प्रोडक्सनबाट कमेडी च्याम्पियन सिजन ३ बाट चर्चामा आएका कमेडीयन रिषभ काफ्लेले ‘झानेको पिज्जा’ लाईभ स्ट्याण्ड अप कमेडी नेपाल टूर गर्ने भएका हुन । खल्ती बाई आई एम ई प्रमुख प्रायोजक रहेको कार्यक्रम देशका प्रमुख पाँच शहर पोखरा, भैरवा, विराटनगर, चितवन र राजधानी काठमाण्डौमा हुने आयोजकले बताएको छ ।

रिषभ कमेडी च्यम्पियन सिजन ३ का उपविजेता समेत हुन् । च्याम्पियनकै एक एपिसोडमा प्रस्तुती दिनेक्रममा उनले ‘झानेको पिज्जा’ शब्द पहिलो पटक निकालेका थिए जसले सर्वाधिक वाहवाही पाएको थियो ।‘झानेको पिज्जा’ टुरको दैरानमा रिषभले एक घण्टा लामो लाईभ स्ट्यान्डअप प्रस्तुती दिने छन् । टुरको पहिलो कार्यक्रम साउन २३ गते पोखराको बाजेको सेकुवा हुनेछ। त्यसपछि साउन २४ मा भैरहवा बोधि भिल्ला, २५ मा काठमाडौं द हिबाची प्यालेस, लाजिम्पाट, २८ मा विराटनगर ह्यापी आवर हेभन र ३१ मा चितवन हंग्री टममा कार्यक्रम हुने जनाइएको छ।

हास्यलाई जीवनको अङ्ग मान्दै प्रस्तुत गरिएको ‘झानेको पिज्जा’ टुरले नेपाली दर्शकमा नयाँ स्वादको व्यंग्य पस्कने आशा गरिएको छ। आयोजकले देशका विभिन्न सहरमा दर्शकहरूको राम्रो सहभागिता रहने विश्वास व्यक्त गरेका छन् ।