हलमा दर्शक फर्काउदै ‘मोहर’, पूर्वका दर्शक भेट्दै पल

शुक्रबारबाट प्रदर्शनमा आएको चलचित्र ‘मोहर’ ले दुइ दिन सुखद व्यापार गरेको छ । शुक्रबार ठीकठाक व्यापार गरेको चलचित्रले शनिबार दर्शकको राम्रो साथ पायो। शनिबार बिहानीका शोजहरु औषत देखिएपनि मध्यान्नबाट चलचित्र हेर्ने दर्शको भीड बढेको थियो । काठमाडौं मात्र नभएर मोफसलका हलमा पनि बेलुकीका शोसम्म दर्शकको उच्च चाप देखियो । नेपालगञ्जका हलहरुले हिन्दी चलचित्रको शोज कटौती गरेर ‘मोहर’को शोज थपेका थिए ।

चलचित्रले पोखरा, बुटवल, चितवनमा पनि सुखद व्यापार गरिरहेको छ । शनिबार दिनभर नै चलचित्रका निर्देशक ओम प्रतिक, नायक पल शाह, नायिकाद्धय बेनिशा हमाल र नीति शाह काठमाडौंका हल पुगेका थिए । काठमाडौंको अष्टनारायण हलमा दर्शकको भिड लागेको थियो । नायक पल शाहले दर्शकहरुलाई अभिवादन गर्दै धन्यवाद दिएका थिए । दर्शकको उच्च साथ र सकारात्मक वर्ड अफ माउथले आफूहरु उत्साहित भएको नायिकाद्धय बेनिशा हमाल र नीति शाहले बताए ।

आज आइतबार पनि चलचित्रले सुखद व्यापार गरिरहेको छ । काठमाडौं र मोफसलका हलमा आजको अकुपेन्सी पनि उच्च छ । चलचित्रका वितरक करण श्रेष्ठले ‘मोहर’ले केही महिनादेखि देखिएको नेपाली चलचित्रको व्यापारीक खडेरीलाई चिरेको बताए । फिल्म मेकर्स प्रा.लिको व्यानरमा निर्माण भएको चलचित्रलाई चुम्बन जंग शाहीले लगानी गरेका हुन् ।

यसैबिच, नायक पल शाह आज पूर्वका विभिन्न हलमा दर्शक भेट्न पुगेका छन् । काठमाडौंका हलमा भने नायिकाद्धय बेनिशा हलमा र नीति शाह पुगिरहेका छन् । चलचित्रको वर्ड अफ माउथ बलियो छ । यसकारण, यसले आगामी दिनमा पनि दर्शकको साथ पाउने विश्वास निर्माणपक्षको छ । चलचित्रको व्यापारिक आँकडा सार्वजनिक भएको छैन। तर दुई दिनमा चलचित्रले ७०-८० लाख बढीको ग्रस कलेक्सन गरेको अनुमान रहेको छ।