कविता नेपालीको गीत छायांकनसंगै सकियो ‘एक्लो’ को सुटिङ्ग

प्रदिप शाहीको निर्देशनमा तयार भएको वैज्ञानिक कल्पनामा आधारित नेपाली चलचित्र ‘एक्लो’ को सम्पूर्ण छायांकन सम्पन्न भएको छ। निर्देशक शाहीका अनुसार बाँकी रहेको एक गीतको छायांकन सम्पन्न भएपछि सम्पूर्ण सुटिङ सकिएको हो । गीतको छायांकन काठमाडौँमा भब्य सेट लगाएर छायांकन गरिएको हो। स्वप्निल शर्माको स्वरमा रहेको गीतमा कविता नेपाली फिचर्ड रहेकी छिन्। यो गीतको भिडियोको कोरियोग्राफी पनि कविताले नै गरेकी हुन्। यो गीतलाई दशैँमा रिलिज गर्ने तयारीमा निर्माण टिम रहेको छ। ‘एक्लो’ नेपाली चलचित्र क्षेत्रमा दुर्लभ वैज्ञानिक कथामा आधारित चलचित्र हो, जसमा अभिनेता प्रदीप खड्का मुख्य भूमिकामा छन्। चलचित्रको पोस्ट–प्रोडक्सन लन्डनमा भइरहेको छ र आउँदो पुसमा, क्रिसमसको अवसर पारेर रिलिज गर्ने तयारी गरिएको छ।

यसअघि सार्वजनिक गरिएको टिजरमा प्रदीप खड्कासँगै विजय लामा, दिया पुन, कविता नेपाली, जेमी बेकन, बेनिशा हमाललगायतका कलाकारहरू देखिएका थिए। ‘एक्लो’ ले यसअघि कान्स फिल्म फेस्टिभलको बजार क्षेत्र (मार्केट) मा समेत आफ्नो उपस्थिती जनाइसकेको छ, जसले अन्तर्राष्ट्रिय स्तरमा चासो बटुलेको छ।

चलचित्रमा प्रदीप खड्का, विजय लामा, सुनील थापा, दिया पुन, बेनिशा हमाल, दिनेश डीसी, कविता नेपाली, सुरजसिंह ठकुरी, एवन राज उप्रेती, त्रिचु राई, कृष्णभक्त महर्जन, विकास अधिकारी, दिग्गज खत्री, विनोद सुवेदी ‘क्षितिज’, आरुषजंग सारु मगर, श्रीशेष श्रेष्ठ, बालकलाकार जेमिन श्रेष्ठ र स्योन सविक सिंह लगायतको अभिनय रहेको छ। यससँगै बेलायती अभिनेता जेमी बेकन पनि चलचित्रमा देखिनेछन्।

राजकुमार गुरुङ, हरि श्रेष्ठ, विष्णु तामाङ, उत्सव विष्ट, भाइराजा थापा, नवीन सिवा, बागवीर पुन, भुवन अधिकारी, संगीता वादी श्रेष्ठ, रितेश राना, सुशील प्रजापति र शशिकला गुरुङ निर्माता रहेको चलचित्रको कार्यकारी निर्माता विनोद सुवेदी ‘क्षितिज’ हुन्।