कस्तो बन्यो चलचित्र ‘माइतीघर’ को गीत ‘बसन्त नै बस्न खोज्छ यहाँ लोलाएर’ ?

रोहित अधिकारी फिल्मस् प्रा.लिको व्यानरमा निर्माण भएको चलचित्र ‘माइतीघर’को शीर्ष गीत सार्वजनिक गरिएको छ । सञ्जिवनीको स्वरमा रहेको ‘बसन्त नै बस्न खोज्छ यहाँ लोलाएर’ बोलको गीतमा किरण खरेलको शब्द, स्वर्गीय जयदेवको संगीत छ ।

यो गीतको ओर्जिनल भर्सनमा गायिका आशा भोस्लेको स्वर समावेश थियो । ‘माइतीघर’ नामक पुरानो नेपाली चलचित्रको बहुचर्चित गीतलाई निर्माता रोहित अधिकारी र उनको टिमले पुनः बजारमा ल्याएको हो । असोज १३ गते दशैंको फूलपातीबाट चलचित्र रिलिजमा आउँदैछ ।

गीतको भिडियोमा नायिकाद्धय उपासना सिंह ठकुरी र श्यामाश्री शेर्पाले नृत्य गरेका छन् । मानकृष्ण महर्जन र सुशन प्रजापतिको छायांकन रहेको यो चलचित्रमा सुरेन्द्र पौडेलको सम्पादन छ । कविराज गहतराजले यो गीतको भिडियोको कोरियोग्राफी गरेका हुन् । लोकेशन र छायांकनपक्षले दर्शकलाई आकर्षित गर्ने देखिन्छ । भिडियोमा हरेक शब्दले खोजेको लोकेशन छनोट गरिएको छ । यो गीतको भिडियो प्रतियोगीताको समेत घोषणा भइसकेको छ । ४० सेकेन्डदेखि २ मिनेटसम्मको भिडियो बनाउनेमध्ये एक जना उत्कृष्ट दर्शकलाई ५ लाख नगद पुरस्कार दिने घोषणा चलचित्रका प्रस्तुतकर्ता रोहित अधिकारीले गरिसकेका छन् ।

मिलन तामाङको निर्देशनमा तयार भएको चलचित्रमा रबिन शेरचन र धिरज तामाङको लगानी छ । ईश्वर श्रेष्ठ र निरज कटुवाल कार्यकारी निर्माता रहेको चलचित्रमा रामशरण पाठकको लेखन छ । चलचित्रमा केदार प्रसाद घिमिरे, धिरज मगर, प्रकाश सपुत, उपासना सिंह ठकुरी, श्यामाश्री शेर्पा, युवराज लामा, वुद्दि तामाङ, शिशिर वाङ्देल, रजनी गुरुङ, सन्तोष शाही, फूलकुमार बमजम, संगीता थापा लगायतका कलाकारहरुको अभिनय छ ।