प्रदिप र विपना सहितले सुरु गरे ‘आ बाट आमा को छायांकन

चन्द्र पन्तको निर्देशनमा तयार हुने चलचित्र ‘आ बाट आमा’ को छायांकन विहिबार चितवनको देवघाटबाट सुरु भएको छ। चलचित्रको छायांकनको लागि प्रसिद्ध भारतीय अभिनेता प्रदीप रावत अहिले चितवनमा छन्। उनीसँगै विपना थापा,उषा उप्रेती र सिम्रन पन्त चलचित्रको सुटिङ्गमा रहेका छन् । अभिनेता पल शाह भने केहि समयपछि चलचित्रको छायांकनमा जोडिनेछन्। ३५ दिनको सेड्युल रहेको चलचित्रको २५ दिन चितवनमा छायांकन हुनेछ। बाँकी छायांकन काठमाडौं, पोखरा र बेलायतको लन्डनमा हुनेछ ।

चलचित्रको देवघाटमा शुभसाइत पूजा आयोजना गरिएको थियो। रावत र चन्द्र पन्तको चलचित्रमा यो तेस्रोपटक सहकार्य हो । यसअघि यी दुईले हिन्दी चलचित्र माही र नेपालको ‘ह्रस्व दीर्घ’मा सहकार्य गरेका थिए । आर्या इन्टरटेनमेन्टको ब्यानरमा निर्माण हुने यो चलचित्रको कथा र पटकथा निर्देशक पन्तकै छ । संवाद अमर न्यौपाने र अभिमन्यु निरवीको छ ।