अविशेक र आकृति प्रमुख भूमिकामा लिएर ‘कुमारी’ बन्ने

निर्देशक दिनेश राउतको नेपाली चलचित्र निर्देशनमा उच्च स्थान रहेको छ। लभ स्टोरी जनरामा आफुलाई स्थापित बनाएका राउतले पछिल्लो समय सामाजिक कथावस्तुमा आफुलाई अब्बल स्थापित गरे। उनै निर्देशक राउत पुन: लभ स्टोरी जनरामा फर्किएका छन्। नयाँ कलाकारलाई मुख्य भूमिकामा लिएर राउतले केहि दिन अगाडी चलचित्र ‘कुमारी’ को घोषणा गरे।

थिएटरमा अभिनय गरेका अविशेक खड्का र अभिनेत्री आकृति राजभण्डारी यो चलचित्रमा प्रमुख भूमिकामा देखिदैछन्। युवा लभस्टोरीको कथा चलचित्रले बोल्ने कलाकार हेरेर पनि अनुमान लगाउन सकिन्छ। काठमाडौंको टुँडिखेलमा एक कार्यक्रमको आयोजना गर्दै घोषणा गरिएको चलचित्रमा केहर सिंह लिम्बुले संगीत भर्नेछन्। केहर सिंह लिम्बु र उनको ब्यान्ड ‘केहर एण्ड द लुङ्गा’ले सांगीतिक प्रस्तुति दिदै चलचित्रको औपचारिक घोषणा गरिएको थियो ।

कार्यक्रममा लिम्बुले ‘कहाँ छौं’ बोलको गीत प्रस्तुत गरेका थिए, जुन गीत चलचित्रमा समावेश हुनेछ । बिनिश इन्टरटेन्मेन्टले निर्माण गर्न लागेको चलचित्रलाई पिक्चर फ्रेमको सहकार्यमा तयार पारिनेछ । महेन्द्र अधिकारी चलचित्रका निर्माता हुन्। विकास सुवेदीले कथा लेखेको चलचित्रमा घनश्याम जोशी, सुनिता श्रेष्ठ, आकांक्षा कार्की, मधु खड्का, सनम श्रेष्ठ, सकु शाह, सरोज लामिछाने, मनीषा शर्मा, भूपी लुहार लगायतका कलाकारहरुको अभिनय रहनेछ । केदार भुसाल कार्यकारी निर्माता निर्माता रहेको चलचित्रमा केहर सिंह लिम्बु र प्रशान्त सिवाकोटीको संगीत र सुसन प्रजापतिको छायांकन रहनेछ । चलचित्रलाई यसै बर्ष रिलिज गर्ने तयारीमा निर्माण टिम रहेको छ।