प्रकाश र परिक्षाको ‘सोल्टिनी’ भाइटिकामा रिलिज तय

प्रकाश सपुत र परिक्षा लिम्बू प्रमुख भूमिकामा रहेको चलचित्र ‘सोल्टिनी’ को नयाँ रिलिज मिति तय भएको छ। असोज ३ गतेबाट रिलिज तयारीमा रहेको चलचित्र अव कार्तिक ६ गतेबाट रिलिज हुनेछ। चलचित्रको निर्माण टिमले विभिन्न पोष्टर सार्वजनिक गर्दै नयाँ प्रदर्शन मिति तय गरेको हो।

चलचित्रमा विल्सन विक्रम राई, सब्बु गुरुङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडा लगायतका कलाकारहरुको अभिनय छ । पोस्टरमा प्रेम, संस्कृति र ग्रामीण परिवेशको चित्रलाई झल्काउन खोजिएको छ । अर्जुन सुवेदीको निर्देशनमा तयार भएको चलचित्रले दर्शकलाई नयाँ स्वाद दिने बताइएको छ।

समाजमा व्याप्त अमानवीयता र जातीय भेदभावको कथा भन्ने चलचित्रको छायांकन इलाम बजार, बिब्ल्याँटे, कन्याम, बिर्तामोड, पथरी र भोजपुरका रमणीय दृश्यहरुमा गरिएको छ । चलचित्रमा प्रशान्त सिवाकोटी र हर्कुलस बस्नेतको संगीत, सुशन प्रजापतिको छायांकन छ। प्लानेट थ्री फिल्मस् र योलो इन्टरटेन्मेन्टको सहकार्यमा निर्माण भएको चलचित्रमा रेजिना बिष्ट र संसार चौलागाईं निर्माताको रुपमा छन् भने कार्यकारी निर्माताको रुपमा हर्क साम्पाङ रिभोलुसन एन्ड टिम छ ।