शिव परियारको गीत ‘रिमझिम यादहरू’ सार्वजनिक
काठमाडौं, १३ साउन
गायक शिव परियारको स्वरमा रहेको अल्टरनेटिभ मेलोडी रक जनराको गीत ‘रिमझिम यादहरू’ सार्वजनिक गरिएको छ | आधुनिक, शास्त्रीय ,लोक ,तथा गजल गायनमा पोख्त रहेका गायक परियारको पहिलो पटक अल्टरनेटिभ मेलोडिक रक जनराको गीत सार्वजनिक गरिएको हो।
![](https://i0.wp.com/www.mnmnepal.com/wp-content/uploads/2022/07/shiva-pariyar.jpg?resize=720%2C350&quality=100&strip=all&ssl=1)
दुई दशकभन्दा लामो समयदेखि गायन क्षेत्रमा रहेका गायक परियारले पहिलोपटक यस जनराको गीत रिमझिममा स्वर दिएका हुन् । ‘२२ वर्षदेखि गायक क्षेत्रमा छु । पहिलोपटक फरक जनराको गीतमा स्वर दिएको छु । सुरुमा नयाँ गर्न सक्दिनँ कि भन्ने थियो । तर, न्यायपूर्वक गाउँने कोशिस गरेको छु,’ गायक परियारले भने, ‘दर्शक र स्रोताले मन पराउनुहुन्छ भन्ने विश्वास छ ।’ अमेरिकामा रहेका सर्जक स्रष्टा अनुप पहारीको रिमझिम यादहरूमा शब्द सृजना र संगीत रहेको छ । सर्जक पहारीको शब्द र संगीतमा रक मेलोडीमा स्वर दिन चुनौती भए पनि न्याय गर्न सकेको गायक परियारको भनाइ छ । मनोसंवाद शैलीमा प्रेम कथामा रहेको उक्त गीतले हरेक स्रोताले आफ्नै कथा भेट्न सक्ने उनको दाबी छ । फूलबुट्टे सारीजस्ता चर्चित गीतको भिडियो निर्देशन गरेका राजेश पुमा राईले निर्देशन गरेको रिमझिम यादहरुको भिडियोमा निराजन प्रधान र करूणा श्रेष्ठलाई फिचरिङ गरिएको छ ।
![](https://i0.wp.com/www.mnmnepal.com/wp-content/uploads/2022/07/295553606_383899357197126_7112187235905445235_n-1.jpg?resize=720%2C480&quality=100&strip=all&ssl=1)
उत्सव दाहालको छायांकन रहेको भिडियोलाई विकास दाहालले सम्पादन गरेका छन् । सर्जक अनुप पहारी निर्माता रहेको गीतको भिडियोमा क्रियटिभ डाइरेक्टरको रुपमा राजु गुरुङ छन् ।