कुल व्वाइ र दिव्याको प्रेमको उतारचढाव बोकेको ‘बेहुली ‘ ट्रेलर सार्वजनिक
सशांन कंडेलको निर्देशनमा तयार भएको चलचित्र ‘बेहुली’ को ट्रेलर सार्वजनिक भएको छ। रिलिज हुन् ५ दिन अगाडी चलचित्रको टिमले ट्रेलर सार्वजनिक गरेको हो। भोटेकोसी क्षेत्रमा आएको अनपेक्षित र विनाशकारी बाढीका कारण देशले बेहोर्नु परेको सङ्कट र पीडालाई मध्यनजर गर्दै निर्माण पक्षले यसअघि चलचित्रका सम्पूर्ण प्रचारप्रसारका कार्यक्रमहरू स्थगित गरेको थियो। देशको असहज परिस्थितिलाई आत्मसात् गर्दै रोकिएको प्रचारप्रसारलाई स्थिति केही सहज भएसँगै ट्रेलर सार्वजनिक गरेर पुनः सुरु गरिएको हो।
चलचित्रका प्रस्तुतकर्ता अर्जुन पोख्रेलले ट्रेलर रिलिज कार्यक्रममा बक्स अफिसमा गर्ने कुल कमाइबाट निर्माताको भागमा पर्ने सम्पूर्ण रकमको ५ प्रतिशत प्रधानमन्त्री दैवी प्रकोप उद्धार राहत कोषमार्फत भोटेकोसी क्षेत्रका बाढी प्रभावितहरूका लागि प्रदान गरिने बताए।
सार्वजनिक गरिएको ट्रेलरमा माया, प्रेम, पारिवारिक सम्बन्धका विविध आयामहरूलाई समेटिएको छ। विशेष गरी ‘कुल ब्वाई’को नामले सामाजिक सञ्जालमा समेत परिचित कलाकार पारस बम ठकुरी र अभिनेत्री दिव्या रायमाझीबिचको प्रेमको केमेस्ट्रीलाई ट्रेलरमा प्रस्तुत गरिएको छ।
त्यस्तै, अभिनेता सुशान्त कार्कीलाई प्रहरीको एक सशक्त भूमिकामा देख्न सकिन्छ। लोकप्रिय कमेडियन पदम तामाङको कमेडी र कलाकार सन्तोष बानियाको विल्कुलै फरक एवं प्रभावशाली अभिनयले ट्रेलरलाई अझ रोचक बनाएको छ।
माधव शर्माको लेखन रहेको चलचित्रमा पारस, दिव्या, सुशान्त, पदम र सन्तोषको साथमा सरिता गिरी, विशाल पहारी, कर्मा लामा, दीपक गौली, विमल यादव, अविरल श्रेष्ठ, सविन कट्टेल र समायरा थापा मगर लगायतका कलाकारको अभिनय रहेको छ ।
द डिभाइन म्युजिक र सम्मान इन्टरटेन्मेन्टको संयुक्त प्रस्तुति रहेको चलचित्रमा अर्जुन पोखरेल प्रस्तुतकर्ता रहेका छन् भने प्रताप शमशेर राणा निर्माता, कार्यकारी निर्मातामा शङ्कर कोइराला र रमेश सिलवाल, सह-निर्माता दुर्गा खरेल र शिशिर श्रेष्ठ छन् । कोसिस राज क्षेत्री र सम्राट क्षेत्री लाइन प्रोड्युसर हुन् ।
