मिलन चाम्सको ‘गोर्खा वारियर’ टिजर, तीन भाषामा चलचित्र रिलिज हुने

मिलन चाम्स निर्देशित चलचित्र ‘गोर्खा वारियर’ को टीजर रिलिज भएको छ। विर गोर्खालीको युद्धको कथालाई प्रस्तुत गरिएको चलचित्र नेपाली, हिन्दी र अँग्रेजी भाषामा निर्माण भएको छ।

विश्वमा परिचित गोर्खा सैनिकले पहिलो विश्वयुद्ध देखि अहिलेसम्म धेरैवटा युद्ध लडेको स्मरण गर्दै चाम्सले उनीहरुसँग कैयौं युद्धसँगै पारिवारिक मार्मिक कथा भएको र त्यो मध्ये एउटा वास्तविक कथालाई यसपटक पर्दामा उतारेको बताए ।निर्देशक चाम्सका अनुसार सन १९४९ को ‘मलाया इमरजेन्सी जँगल वार’ मा गोर्खाली सैनिकको शाहसिक युद्ध कथालाई यो चलचित्रमा उतारिएको छ । टिजरमा पनि सोही युद्धको झलक प्रस्तुत गरिएको उनले प्रकाश पारे ।

निर्देशक चाम्सले यसपटक ब्रिटिस गोर्खा सैनिकले ‘मलाया इमरजेन्सी जँगल वार’ युद्धमा गरेको सँघर्ष र उनीहरुको साहसिक कथालाई गोर्खा वारियर मार्फत विश्वका चलचित्र हलमा ल्याउन लागेको बताए । आगामी जुनमा यो चलचित्रलाई बेलायतमा १० हजार दर्शकमाझ विशेष प्रदर्शन गर्ने पनि उनले जानकारी गराए ।

चलचित्रमा बिजय लामा, रेविका गुरुङ, रियर राई, शिशिर बाङ्देल, कविता आले, बिरूप घले, सारा राईलगायतका कलाकारको मुख्य भूमिको छ । यहि चलचित्र मार्फत रितेश चाम्सले अभिनयमा डेव्यु गरेका छन्। नेपाल र मलेशियामा छायाँकन भएको गोर्खा वारियरमा मिलन चाम्स र गिरिराज घिमिरेको लेखन, अर्जुन जिसीको सम्पादन, सुदीप बरालको डीओपी, हिमाल केसीको द्वन्द्व निर्देशन, शैलेन्द्र खनाल ‘शरद’को गीत, एलिस कार्कीको संगीत, राजेशपायल राईको गायन रहेको छ।