आदिपुरुष विवाद उत्कर्षमा: काठमाडौँ र पोखरामा हिन्दी चलचित्र प्रदर्शन बन्द


भारतीय चलचित्र ‘आदिपुरुष’ विवाद नेपालमा चर्चाको बिषय बनिरहेको छ। चलचित्रमा समावेश गरिएको संवादको कारण काठमाडौँ महानगरपालिकाका मेयर बालेन शाहले हिन्दी चलचित्र प्रदर्शनको रोक लगाएका छन्। उनले शुक्रबार नै चलचित्रमा समावेश संवाद हटाउन ३ दिने अल्टिमेटम दिईसकेका थिए।


हिन्दी चलचित्र प्रदर्शनको रोक लागेको घोषणा गर्दै बालेन लेख्छन् ,’भारतीय चलचित्र आदिपुरुषमा समावेश भएको जानकी भारतीय छोरी हुन् भन्ने आपत्तिजनक सन्देश उक्त चलचित्रको मूल भागबाट हटाउन हामीले ३ दिन पहिले हटाउन आवहान गरेको थियौ । नेपालको स्वतन्त्रता, स्वाधिनता र स्वाभिमानलाई अक्षुण्ण राखी राष्ट्रहितको रक्षा गर्नु प्रत्येक सरकार, सरकारी निकाय, गैरसरकारी क्षेत्र र नेपाली नागरिकको पहिलो कर्तव्य हुने कुरामा कुनै सन्देह छैन । नेपालको संविधानको धारा ५ र ५६ को उपधारा (६) ले संघ, प्रदेश र स्थानीय सरकारलाई राष्ट्रिय हितको संरक्षण गर्ने जिम्मेवारी तोकेको छ । उक्त चलचित्र यथावत् प्रदर्शन भएमा नेपालको राष्ट्रियता, सांस्कृतिक एकता र राष्ट्रिय विभुती माथि ठाडो प्रहार भई अपूरणीय क्षति हुने देखिन्छ । उक्त चलचित्रबाट नेपाल माथि सांस्कृतिक अतिक्रमण भएको हुँदा यस महानगरपालिकाको गम्भीर ध्यानाकर्षण भएको छ । काठमाडौँ महानगरपालिका क्षेत्रभित्र उक्त राष्ट्रहित विपरितको चलचित्रको प्रदर्शनलाई निषेध गरेर मात्र देशभित्रका अन्य क्षेत्र र विदेशमा सो चलचित्र प्रदर्शन हुन दिने हो भने त्यसले भ्रामक तथ्य स्थापित गर्ने भएकोले उक्त चलचित्रबाट आपत्तिजनक अंश नहटाएसम्म काठमाडौ महानगरमा कुनै पनि भारतीय चलचित्र प्रदर्शन गर्न भोलि देखि निषेध गरिएको छ ।’

मेयर बालेन शाहको यो घोषणाको प्रभाव पोखरामा पनि परेको छ। पोखरा महानगरपालीका ले एक परिपत्र जारी गर्दै चलचित्र आदिपुरुषमा समावेश भएको ‘जानकी भारतकी छोरी’ हुन् भन्ने संवाद नहटाएसम्म पोखरामा कुनै पनि भारतीय चलचित्र चल्न नदिने उल्लेख गरिएको छ।

प्रतिक्रिया दिनुहोस्