‘दान्भी’ की पूजा शर्मा, इन्ट्री दृश्यमा यस्तो अवतार (फोटोफिचर)

जेठ १० गतेबाट रिलिजमा आउन लागेको चलचित्र ‘दान्भी’को हाल धमाधम गीत र एक्सनको दृश्यको छायांकन भइरहेको छ । काठमाडौंमा छायांकन भइरहेको चलचित्रको सेटबाट नायिका पूजा शर्माका केही तस्विरहरु सार्वजनिक भएका छन् । जहाँ, पूजाको एक्सन अवतार देख्न सकिन्छ ।

वुझिएअनुसार, चलचित्रमा पूजाको इन्ट्री दृश्यको छायांकन हाल भइरहेको छ । निर्माणपक्षले यो दृश्यलाई भव्य बनाउनका लागि कुनैपनि कसर बाँकी राखेको छैन ।

चलचित्रको इन्ट्री दृश्यमा गीत र एक्सनलाई मिश्रण गर्ने तयारी गरिएको छ । जसअनुसार, शनिबारदेखि एक्सनको छायांकन भइरहेको हो । केही दिनपछि भने गीतको भाग खिचिने निर्माणपक्षले बताएको छ । यो चलचित्रमा नायिका पूजा शर्मा, नायक कुन्साङ बोमजोम र कलाकर किरण श्रेष्ठको मुख्य भूमिका छ । रुपेश तामाङ यो चलचित्रका निर्देशक हुन् ।

एक्सनले भरिएको टिजर सार्वजनिक भएसँगै यो चलचित्र चर्चामा छ । यसैले, यो चलचित्रलाई दर्शकले अपेक्षा गरे अनुसार निर्माण गर्ने कसरतमा निर्माणपक्ष लागिरहेको छ । देव मगर र अनुप गडालको लगानी रहेको चलचित्रमा पवन राना मगर कार्यकारी निर्माता रहेका छन् ।