‘पीआर’ निर्देशन गर्दै शोभित बस्नेत, अष्ट्रेलियामा हुनेछ छायांकन

शोभित बस्नेतको निर्देशनमा नयाँ चलचित्र ‘पीआर’ निर्माण हुने भएको छ। सलोन सलिना फिल्मसको व्यानरमा निर्माण हुने चलचित्रमा आरएफएम फयासिलिटी मेनेजमेन्ट अष्ट्रेलिया र ल्यान्ड वे डम्प्लिङ सिड्नी प्रस्तुतकर्ता रहेका छन्। चलचित्रमा ए वान ग्रुप सर्भिसका प्रदीप दाहाल निर्माता र एप्लाई वर्ल्डका गणेश केसी कार्यकारी निर्माता रहेका छन् । चलचित्रको फस्टलुक पनि सार्वजनिक गरिएको छ।

फस्टलुकमा हातमा सुटकेस बोकेर अष्ट्रेलिया जान लागेका एक व्यक्तिलाई देखाइएको छ । जसको शरीरको आधा भाग महिलाको छ भने आधा पुरुषको । महिलाको भागमा नेपालको झण्डा देखाइएको छ भने पुरुषको भागमा हातमा सुटकेस बोकेर कोट लगाएको देखाइएको छ । पृष्ठभूमिमा अष्ट्रेलिया र नेपालको दृश्य राखिएको छ । त्यस्तै उडिरहेको हवाईजहाज पनि देखाइएको छ ।

निर्देशक शोभितका अनुसार चलचित्रका लागि हाल अष्ट्रेलियाका विभिन्न स्थानमा अडिसन भइरहेको छ । चलचित्रको सम्पूर्ण छायांकन अष्ट्रेलियाको विभिन्न सहरमा गरिनेछ । ‘सम्पूर्ण कलाकार र प्राविधिक अष्ट्रेलियाबाटै छानिनेछन् । अङ्ग्रेजी नयाँ वर्ष २०२५ को अवसर पारेर हामी सुटिङमा जानेछौं’, बस्नेतले भने ।