दशैँको फूलपातीमा थपियो ‘अभिमन्यु: च्याप्टर १’ , अव ४ चलचित्र एकसाथ
भदौ २७ गतेबाट रिलिज तयारीमा रहेको चलचित्र ‘अभिमन्यु : च्याप्टर १’ को नयाँ प्रदर्शन मिति तय भएको छ। जेनजीको आन्दोलनका कारण रिलिज हुननसकेको चलचित्र अव दशैँको फूलपाती अर्थात् असोज १३ गतेबाट रिलिज हुने भएको छ। यो मितिमा पूर्वनिर्धारित तीन चलचित्र प्रदर्शनको तयारीमा रहेका छन्। ‘हरिबहादुरको जुत्ता’, ‘माइतिघर’ र ‘बलिदान’ तीन चलचित्र यस अगाडी नै रिलिजको तयारीमा रहेका छन्। अव यो मितिमा ४ चलचित्र रिलिज हुने पक्का भएको हो।
“भदौ २७ गते प्रदर्शनमा ल्याउने पूर्वनिर्धारित मिति तय गरिएको भए पनि देशको विषम परिस्थितिलाई मध्यनजर गर्दै हामीले प्रदर्शन स्थगित गरेका थियौँ । तर अहिले देशमा भएको आमूल परिवर्तनलाई सकारात्मक दृष्टिले लिएर हाम्रो चलचित्र उद्योगलाई निरन्तर चलायमान र गतिशील बनाउने उद्देश्यका साथ हामीले नयाँ प्रदर्शन मिति घोषणा गरेका छौँ,” चलचित्र निर्माण कम्पनी सेभेन सिज नेपालले विज्ञप्ति जारी गर्दै भनेको छ, “नेपाली भाषामा असोज १३ गते (फूलपातीको दिन) देखि देशभर तथा विश्वव्यापी रूपमा एकैसाथ प्रदर्शन हुनेछ ।”
हिन्दी भाषामा भने असोज १७ गतेदेखि भारतमा तथा विश्वव्यापी रूपमा एकैसाथ प्रदर्शन हुनेछ । निर्माता विनोद पौडेलले भदौ २७ गते नै रिलिज हुने भनेर प्रचार गरेकाले धेरै बजेट पब्लिसिटीमा लगानी भइसकेकाले लामो समय दर्शकलाई होल्ड गर्न नसकिने बताए ।
“हामी सोच विचार गरेर नै फूलपातीमा आउने निर्णय गरेका हौँ । कसैसँग जुध्ने र जुधाउने हाम्रो उद्देश्य होइन । धेरै पछि जाने अवस्था पनि छैन,” विनोदले भने, “हामी भदौ २७ मा आउँदा सोलो रिलिजको मौका पाएका थियौँ । तर, परिस्थितिले हामीलाई असोज १३ मा ल्याइपुर्याएको हो । हामी सरसल्लाह गरेर नै यो मितिमा आएका हौँ ।”
विदेशमा पनि शो लिइसकेकाले धेरै पर जान नसकेको उनले प्रष्ट पारे । सेभेन सिज सिनेमाको प्रस्तुति निर्माण भएको चलचित्रमा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल मुख्य भूमिकामा छन् ।
सुशान्त गौतमले निर्देशन गरेको चलचित्रको क्रिएटिभ निर्देशक मदन थापा हुन् भने मुकेश खनालको लेखन रहेको छ । चलचित्रका निर्माता विनोद पौडेल र गुञ्जन गिरी, रमेश चौलागाईं र हरि श्रेष्ठ सह–निर्माता र कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् ।
