किन हेर्ने ‘अभिमन्यु : च्याप्टर–१’ ?

मङ्सिर १८ गतेबाट चलचित्र ‘अभिमन्यु : च्याप्टर–१’ रिलिज हुँदैछ। यो चलचित्र नेपाली र हिन्दी दुवै भाषामा नेपालभर एक साथ प्रदर्शनमा आउँदै छ । पटकपटक रिलिज मिति सर्दै आएको चलचित्र अन्तत: मङ्सिर १८ गतेमा रिलिज हुने पक्का भएको हो। विनोद पौडेलको निर्माणमा तयार भएको चलचित्र हेर्नपर्ने कारणहरु धेरै रहेका छन्। स्टार भ्यालु भन्दा पनि अभिनयमा पारङ्गत रहेका कलाकारहरुको टिम बनाएर तयार पारिएको चलचित्र कस्तो बनेको छ भन्ने जिज्ञासा रहेको छ।

यो चलचित्र अभिनेता कामेश्वर चौरसिया र अभिनेत्री लक्ष्मी बर्देवाको पहिलो लिड रोल हो। अभिनयमा पारङ्गत रहेका दुवैको चलचित्रमा लिड भूमिका कस्तो रहनेछ भन्ने दर्शकमा कौतुहलता रहेको छ। आफुलाई प्रमाणित गर्ने दुवैले चलचित्रमा कडा मिहेनत गरेको प्रतिक्रिया दिदै आएका छन्। अझ लक्ष्मी त छायांकन गरेका ४ वटा चलचित्र रिलिज रोकिएको अवस्थामा अभिमन्यु रिलिज हुँदैछ।

‘पूर्ण बहादुरको सारङ्गी’ जस्तो एतिहासिक चलचित्र निर्माण गरेका विनोद पौडेलके निर्माण गरेको चलचित्र भएको कारण पनि यसलाई चासोका साथमा हेरिएको छ ।

निर्माता विनोद पौडेलले दोस्रो रोजाइमा रहेका कलाकारलाई लिएर ‘पूर्ण बहादुरको सारङ्गी’ ऐतिहासिक रूपमा सफल बनाए । अहिले पनि उनले ‘पूर्ण बहादुरको सारङ्गी’ मा जस्तै कसैले पनि सोलो लिडमा नलिएका कलाकारलाई लिएर चलचित्र बनाएका छन् । त्यसैले यो पटक पनि उनले किन रिस्क लिएर फेरि पनि अरुले लिडमा अफर नगरेको कलाकारलाई लिएर चलचित्र बनाए त्यसका लागि पनि यो चलचित्र हेर्नुपर्नेछ ।

सेभेन सिज सिनेमाको प्रस्तुति निर्माण भएको ‘अभिमन्यु : च्याप्टर १’ मा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल मुख्य भूमिकामा छन् ।

सुशान्त गौतमले निर्देशन गरेको चलचित्रका निर्माता विनोद पौडेल र गुञ्जन गिरी हुन् भने रमेश चौलागाईं र हरि श्रेष्ठ सह–निर्माता रहेको चलचित्रका कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् ।

‘