अन्तर्राष्ट्रिय फेशन शोमा दिपकको बलियो उपस्थिति

नेपली फेसन क्षेत्रमा परिचित नाम हो, दिपक घिमिरे। नेपाल सहित अन्य देशमा आयोजना हुने फेशन कार्यक्रममा उनको सहभागिता रहदै आएको छ। यहि बीचमा उनले अमेरिकामा आयोजित एक प्रतिष्ठित अन्तर्राष्ट्रिय फेशन कार्यक्रममा नेपाललाई प्रतिनिधित्व गर्दै रनवे प्रस्तुति दिएका छन् ।

अमेरिकाको चर्चित American Dream भेन्यूमा सम्पन्न अन्तर्राष्ट्रिय फेशन शोमा घिमिरेले विश्वका विभिन्न मुलुकबाट सहभागी भएका चर्चित मोडल तथा फेशन व्यक्तित्वहरूसँग एउटै रनवेमा आफुलाई उभ्याएका थिए । कार्यक्रममा Miss Universe, Miss USA, Miss Honduras लगायत अन्तर्राष्ट्रिय सौन्दर्य तथा फेशन क्षेत्रका चर्चित अनुहारहरूको सहभागिता रहेको थियो ।

विश्वका विभिन्न देशका मोडल, डिजाइनर र फेशन क्षेत्रका व्यक्तित्वहरूको सहभागिताले कार्यक्रमलाई अन्तर्राष्ट्रिय स्वरूप दिएको थियो । पाकिस्तान, भारत, बंगलादेश, नेपाल तथा अमेरिकालगायत देशका प्रतिभाशाली पुरुष मोडलहरूको समेत उल्लेखनीय सहभागिता रहेको कार्यक्रममा विभिन्न संस्कृति, पहिचान र फेशन शैलीलाई एउटै मञ्चमा प्रस्तुत गरिएको थियो ।

यस फेशन शोमा नेपाली मोडल दीपक घिमिरेले विश्वप्रसिद्ध लक्जरी घडी ब्रान्ड IWC Schaffhausen को आकर्षक घडी लगाएर रनवेमा प्रस्तुति दिएका थिए । रनवेमा घिमिरेको पहिरनसँगै उक्त प्रतिष्ठित ब्रान्डको घडीलाई समेत विशेष रूपमा शोकेस गरिएको थियो ।

अन्तर्राष्ट्रिय फेशन बजारमा लक्जरी घडीलाई केवल समय बताउने उपकरणका रूपमा मात्र नभई व्यक्तिगत शैली, प्रतिष्ठा र फेशन स्टेटमेन्टका रूपमा समेत प्रस्तुत गरिँदै आएको अवस्थामा घिमिरेको यो प्रस्तुति विशेष मानिएको छ ।