दयाहाङ्गसंग ‘रिमै’ गर्न नेपाल आइन् कबड्डीकी मैंया

कबड्डी शृखंलाकी मैंया अर्थात् रिश्मा गुरुङ नयाँ चलचित्र ‘रिमै’ को छायांकनको लागि नेपाल आएकी छन् । लामो समयदेखि श्रीमानसँग अमेरिकामा बस्दै आएकी रिश्माले चलचित्रको कथावस्तुले मन छोएकाले काम गर्न तयार भएर नेपाल आएको बताईन्।

‘म लामो समय पश्चात चलचित्रको पर्दामा फर्किदै छु । लामो त होइन मैले बिचमा क्रसरोड नामक चलचित्रमा काम गरेकी थिए । त्यो चलचित्र अहिलेसम्म पनि प्रदर्शनमा आएको छैन् । त्यसैले गर्दा लामो ग्याप जस्तो देखियो’, उनले भनिन्, ‘विशेषगरी रिमै गुरुङ संस्कार र संस्कृतिमा आधारित रहेर निर्माण हुन लागेकाले पनि काम गर्न तयार भएकी हुँ । अनि चलचित्रको मुख्य भूमिकामा दयाहाङ राई र सौगात मल्ल भएकाले पनि काम गर्न उत्साहित छु ।’

खिल बहादुर गुरुङको निर्देशनमा निर्माण हुने चलचित्रलाई बिर बहादुर घलेले मिर्नण गर्दैछन् । चलचित्रको असोज २८ गतेबाट गोरखाको सिरानचोकबाट छायांकन सुरु गरिने निर्देशक गुरुङले बताए । चलचित्रमा रिश्मासँगै दयाहाङ राई, सौगात मल्ल, कविता आले र माओत्से गुरुङको मुख्य भूमिका रहनेछ ।

‘जारी’ र ‘मनसरा’ फेम्ड निर्देशक उपेन्द्र सुब्बाको लेखन रहेको चलचित्रको दशैंको घटस्थापनाको दिन औपचारिक रुपमा शुभमुहूर्त गर्दै निर्माणको सुरुवात गरिनेछ ।