दुई चलचित्रको चेपुवामा ‘बुलाकी’, स्टार र ब्रान्डको चपेटामा परेको निर्माताको गुनासो
बैशाख १ गते तीनवटा चलचित्र रिलिज हुने तयारीमा रहेका छन्। चलचित्रका प्रचार सार्वजनिक भए देखि नै तीन वटै चलचित्रलाई दर्शकले उत्साहजनक रुपमा हेरेका छन्। तर एकसाथ चलचित्र रिलिज हुँदा शो वितरण र इनिशियल व्यापारमा फरक प्रभाव पर्ने पक्का देखिन्छ। चलचित्र जारीले मल्टीप्लेक्समा उच्च शोज पाएको छ। ‘बिहे पास’ दोश्रो नम्बरमा रहंदा चलचित्र ‘बुलाकी’ भने चेपुवामा परेको छ। चलचित्र जारी र बुलाकी उस्तै कथामा निर्माण भएका चलचित्र हुन्। फरक संस्कृतिमा रहेका एकै कथामा निर्माण भएका दुई चलचित्रमा जारीको क्रेज राम्रो देखिएको छ। बुकिङ्गको मामिलामा पनि जारी उत्साहजनक देखिएको छ।
![](https://i0.wp.com/www.mnmnepal.com/wp-content/uploads/2023/02/bulaki.jpg?resize=720%2C528&quality=100&strip=all&ssl=1)
चलचित्र चेपुवामा परेपछि निर्माता विराज विष्टले सामाजिक संजाल मार्फत गुनासो पोखेका छन्। उनले स्टार, ब्रान्ड र अस्वस्थ राजनीतिको चपेटामा चलचित्र परेको उल्लेख गरेका छन्।
बिष्ट लेख्छन् ,’ स्टार , ब्रान्ड र अस्वस्थ राजनितीको चपेटामा बुलाकी, नया बर्षको दिन बैशाख १ गते तीन चलचित्र छन । सबै चलचित्रमा निर्माताको लगानी सम्पुर्ण टिमको मेहनत जोडीएको हुन्छ । सबैलाई चलचित्र दर्सक सामु पुर्याउनु छ । कृपया नजन्मेको शिशुको भुर्ण हत्या नगरिदिनुस । पहिला २ शो दिने अनि केहिबेर मा १ शो घटाइ दिने चलचित्र हेर्न बाकी नै छ यति हतार नगरिदिनुस । शो घटाउने बढाउने दर्शकको हातमा छोडीदिनुस ।।। सबै चलचित्रलाई बराबर शो दिनुस दर्शकले माया नगरे हटाइ दिनुस हाम्रो गुनासो छैन ।।।’